استفسار عن سير معاملة تغيير التخصص

السلام عليكم ورحمة الله وبركاته

انا موضوعي الان تغيير تخصص وعلى حسب علمي انا المبتعثين من قبل وزارة التعليم العالي ( برنامج خادم الحرمين الشريفين ) الملحقية مخولة وعندها الصلاحية بتغيير التخصص

وانا الان رفعت الطلب ووصل الى مساعد الملحق للشؤون الدراسية وبعد ذلك تم رفع الطلب للوزارة !!!!! ولا ادري ما هو سبب رفع الطلب للوزارة ؟؟؟

فهل الان جميع طلبات تغيير التخصص يجب ان تذهب للوزارة ؟؟؟ مع العلم انني متخرج من كلية الإدارة و الاقتصاد تخصص إدارة نظم معلومات وحصلت قبول في تخصص السياسة العامة والإدارة

لاني والله قاعد اسمع كلام يخوف لانه ناس كثير قالولي اذا راح الوزارة بتزداد الأمور تعقيد و احتمال كبير تترفض

فسؤالي الان هل في احد فيكم يا اخوان طلبه راح الوزارة ؟؟؟

ياليت لو تفيدونا لاهنتم لانه والله العظيم خلاص الواحد كره حياته وعمره

والملحقية ما عندهم الا كلمة ( شفلك قبول ثاني نفس قرار ابتعاثك ) على بالهم القبول يوزع مجانا ولا يباع ما يدروا انه الطالب تطلع عينه عشان يحصل قبول للماجستير

فيا ليت لو احد فيكم مرت معاملة بالوزارة ويفيدنا وجزاكم الله خير

ووفق الله الجميع لما يحبه ويرضاه

اختي: المعاملة بعد ماتخلص من الملحقية الثقافية تروح للوزاره بالتحديد اللجنة وهذه اللجنه تتجمع فقط يوم الاثنين.. ومنها يُقرر قبول ام رفض...

انا حالياً مثل وضعك بس لسا المعامله ف الملحقية..

جزاك الله خير اخوي على الرد واسأل الله العظيم ان يسهل امري وامرك وجميع المسلمين

بس والله قلق مو طبيعي يعني لو الواحد يضمن انها بتمشي بالوزارة ماعنده مشكله لو يستنى شهر

بس الخوف بعد التعب ذا كله ويترفض الطلب خصوصا اني سمعت انه طلبات كثيرة اترفضت دون أسباب مقنعه

الله يسهل الأمور

انا بنت موب ولد 😀

والله انا مثلك حييييل خايفه خاصه انه ماعندي فرصه والوقت حيييل ضيق.. تعالي خاص اذا ممكن

انا مثلكم راحت للوزاره ورفضو وطلعت للرياض اخلاقهم زفت صايره
اقولهم تابع لتخصصي وماعندي قبول غيره انا من الدفعه الثامنه واقدر اغير تخصصي وربي كان الواحد يشحد منهم
بهذلوني ولا عارفه وش اسوي حسبي الله عليهم مايحترمو اللي يكلمهم بس بيخلصو ودهم يطردو الواحد وباستعزاء جيبي القبول اللي الملحقيه طلعتك عليه تسويق ايش ابغى فيه يعني الواحد على بالهم نلعب نتعب وايلتس ومرمطه واخرتها كذا لازم يعني واسطه عشان تمشي الامور
حسبي الله عليهم وبالاخص فوزي بخاري انسان ماعرف كيف خلوه هناك لا احترام ولا شي ماعرف كيف متعلم تعامله تعامل شخص جاهل
مقهوره منهم ولا لي الا رب العالمين بإذن الله الله يبلغني فيهم ولا يضيع تعبنا

لاحول الله حسبي الله عليهم.. ايش سبب الرفض!؟

لا حول ولا قوة الا بالله. أصلا هم من متى اخلاقهم طيبه عشان تصير زفت؟؟؟؟!!!! 95% من الي شغالين في الملحقيات ووزارة التعليم اخلاقهم زفت وكل واحد يحسسك انه دافع فلوس بعثتك من جيبه
وفي نقطه بالنسبة لتغيير التخصص احب انبه الاخوان والاخوات عليها

شوفو يا جماعة اذا كان قبولك للماجستير بعيد عن تخصصك للبكالوريوس فهذي انسى انها تمشي نهائيا بمعنى لو كان تخصصك هندسة معمارية وحاب انك تحضر ماجستير في القانون هذي انسى نهائيا انها تمشي حتى لو كان عندك قبول نهائي للقانون الا عاد لو كان عندك واسطه وللأسف حتى الواسطات الان في الوزارة ما تمشي يا انك تعرف واحد مسؤول له كلمته ولا انسى لأنه الان مع الأنظمة المستحدثة أصبحت الواسطة يبالها واسطه ثانيه

ولكن في طلبات تغير تخصص ممكن تمشي في الوزارة بمعنى لو كان تخصصك في البكالوريوس محاسبة وحبيت انك تحضر ماجستير في الإدارة المالية هذي (((ممكن))) تمشي لأنه في مواد تدرس في كلا التخصصين

بس للأسف الان محد عارف ايش الي صاير في الوزارة الموضوع جدا غامض !!!!!؟؟؟ وكل واحد يرمي ع الثاني وكل واحد يقولك انا ما بيدي شيء؟؟؟!!!!

يعني الي اعرفه انه تغيير التخصص اذا كنت مبتعث من قبل وزارة التعليم العالي بعثات برنامج خادم الحرمين الشريفين يتم من قبل الملحقية ولكن الان محد عارف ايش الي صاير كل الطلبات صارت تروح للوزارة وقرارات وأنظمة مستحدثة و جميعها ليست في صالح الطالب

وبعدين بالنسبة للمرحلة التاسعة يقولك لا يحق لك تغيير التخصص مع اني ما قيد شفت قرار وزاري او تصريح بالكلام هذا؟؟؟ فعلى أي أساس لا يحق لي تغير التخصص مع العلم انني وقت تدقيق الأوراق في فندق المريديان في جدة قبل ما اطلع للبعثة تكلمت مع الشخص المدقق لأوراقي و سألته هل بإمكاني تغيير تخصصي؟؟ لأنه انا قرار ابتعاثي تسويق وانا ابغى موارد بشريه..... قلي ايوه عادي مداك تغير من الملحقية من هناك بس اهم شيء تكون الجامعة معترف فيها والتخصص معترف فيه ويكون يندرج تحت الكلية الي انت اتخرجت منها بمعنى انه يجب ان يكون هناك روابط بين التخصصين والملحقية هناك في أمريكا بتغير تخصصك وقلي انت أصلا بمجرد وصولك أمريكا الملحقية هي الجهة المسؤولة عنك..... و لكن الان الأمور اختلفت اختلاف جذري.... وكل واحد في الملحقية يقول كلام...... واحد يقول لازم تجيب قبول امتداد لتخصص البكالوريوس بمعنى لو انت درست بالبكالوريوس تسويق لازم تحضر ماجستير في التسويق ....... والثاني يقول لازم تجيب قبول نفس القبول المدون في قرار ابتعاثك حتى لو كان القبول المدون في قرار ابتعاثك لا علاقة له في تخصص البكالوريوس!!!!!!؟؟؟؟ لأنه حجتهم انك انت وقعت أصلا على تعهد بعدم تغيير التخصص وتوقيعك هذا إقرار منك على انك راضي بالتخصص هذا ..... و طبعا منت عارف تمشي على كلام مين وتصدق مين؟؟؟

وانا الان مثلي مثلكم موضوعي في الوزارة والمعاملة واقفه عند إدارة متابعة المبتعثين ( تقييم الطلب) ما تحركت و عندي دورة جي ار أي ومني قادر ارجع للرياض اراجع في معاملتي بس الشكوى لله والله يستر بس بعد ما الواحد تعب وتغرب وايلتس وجيمات وقرف ورفض من جامعات وجاب قبول بطلوع الروح وفي النهايه رفض

بس تكفون يا جماعه لو احد فيكم من مبتعثي المرحلة التاسعة واستطاع انه يغير تخصصه ومرت معاملته بالوزارة ياليت لو يقول لنا وش صار معاه وياليت يقولنا ايش تخصصه للبكالوريوس وقبوله للماجستير

واسال الله العظيم رب العرش العظيم انه ييسر ويسهل امري وامركم وجميع المسلمين

الله يسهل عليك يارب..


انا برضو معاملتي لسا..

انا طالبه متخرجة تربوية ترببة خاصه صعوبات تعلم... والوزاره اعطتني علوم صحيه!!! مادري ايش جاب ذا لذا!! مير الجامعات الي قدمت عليها بهذا التخصص رفضت وبعضهم لازم مواد تكمليه.. لان انا تربوي..
جبت تخصص تربية خاصه تدخل للفئه المتوسطه والمكثفة.. لان قد درست مواد تتعلق بهذا التخصص.. موادي الباكلوريس كلها تدريس واستراتيجيات وطرق.. فكيف راح ادرس علوم صحيه؟؟؟ غير انه يتطلب جي ار اي والاختبار كله ريض وكيم وفيزكس...

ف من جد الوزاره لو رفضت طلبي موب صاحيه .

عندي استفسار
المعاملة وصلت عند مساعد الملحق الثقافي، ايش الخطوه الي بعد؟ بس من يومين وهي عندع والطلب ماتحرك!!! هل يحيلها للوزاره ولا؟ علما بأن انا مرحلة 9

حسبي الله ونعم الوكيل..
انرفضت معاملتي من قبل مساعد الملحق الثقافي..