بسم الله الرحمن الرحيم
زي ما شوفتوا اخوي بحور ما قصر وشرح الوضع بالتفصيل في تقريره عشان كدا أنا راح ادخل في الموضوع على طول واقلكم ايش إلي صار معايا باختصار
المهم أنا وصلت للملتقى حوالي الساعة 6 وكان معايا اثنين من زملائي مبتعثين عن طريق جامعة أم القرى طبعا أنا رحت وكان في بالي هدف معين عشان كدا كنت جاهز وجايب معايا كل الأوراق وكنت حاط جامعات معينة في بالي
< = = (طبعا أنا كان هدفي هو إني احجز قبول في أكثر من جامعة في استراليا عشان لو الجامعة إلي الوزارة اختارتها ما عجبتني أو ما لقيت فيها التخصص إلي ابغاه أكون مضبط وضعي من بدري مع جامعة تانية وأول ما أوصل هناك أحول على طول وأنا انصح الكل يعمل كدا جرب منت خسران طالما التقديم مجاني )
المهم أول ما وصلت رحت على جامعة QUT على طول صراحة الجامعة سمعتها كويسة في الـ IT وكمان الدراسة فيها سهلة نوعا ما وفيها تخصصات حلوة.
طبعا مسكنا سرى ربع ساعة عشان نتكلم مع الدكتور المهم خلينا واحد من زملائي إلي جو معايا يتكلم بإسمنا التلاتة < = = أخوكم بليد في اللغة الإنجليزية
طبعا شرحنالو إحنا ايش نبغى بالضبط وقلنالوا إحنا نبغى برنامج ماستر في الـ IT وانو عندنا بعثة وراح نكمل الدكتوراة المهم زميلي كان يبغى برنامج ريسيرش وأنا كنت أبغى برنامج الكورس وورك المهم سألناه ايش أحسن بما انو إحنا راح نكمل الدكتوراه وهادا كان رد الدكتور:
قال حسب خبرتو في مجال الـ IT هو ينصحنا ببرنامج الكورس وورك المنتهي ببحث ( وأنبه انو في برنامج تاني كورس وورك بدون بحث بس هادا عيبو انك ما راح تقدر تكمل الدكتوراه ) طبعا في هادا البرنامج راح تدرس بنظام الكورسات ولما تخلص في اخر سمستر تعمل بحث وراح تكون مؤهل للدكتوراه أو الـ PHD
ولما سألناه عن سبب إنها أحسن من برنامج الريسيرش قال انو أنت لو اخدت الماستر ريسيرش راح تبدأ في كتابة البحث على طول ولازم بعد 6 أشهر تقدملهم حاجة في البحث ويقيموك تقدر تكمل ولا لا وكمان قال نقطة ثانية انو بعد كدا لما تكمل الدكتوراه البحث لازم يكون اكبر من البحث تبع الماستر وكمان في موضوع مختلف.
المهم إحنا اقتنعنا بكلامو واخترنا إلي قال عليه وعبينا الأبليكيشن وسلمناه مع الأوراق وقال خلال أسبوعين يجي القبول وإنهم راح يرسلولنا أيميل.
بعد كدا قابلت اخوي عبدالعزيز عند جامعة RMIT وزي ما قال الجامعة تعتبر من الجامعات المحترمة في الـ IT وصراحة أنا تحمست لهادي الجامعة بعد ما قابلت اخوي عبدالعزيز وكمان قابلت واحد اعرفو مبتعث عن طريق جامعة الباحة مقدم عليها.
المهم في البداية أنا ما عرفت أتفاهم معاهم < = = إلي كانو معايا ما يبغو يقدمو على دي الجامعة وزي منتو عارفين أخوكم بليد في الإنجلييزي
أخذت الأبليكيشن وعبيتو وكنت راح اسلموا للدكتور وامشي على طول بس صراحة اخوي عبدالعزيز جزاه الله خير ما قصر اخد الأبلكيشن وأعطاه للدكتور وقلوا زميلي بيقدم وأنا راح أترجم الكلام بينكم
المهم أنا قلتلو أبغى كورس وورك وابغاه يأهل لمرحلة الدكتوراه قام اخترلي برنامج سنتين ( سنة ونص كورسات وبعد كدا اخد البحث ) وسلمت اوراقي ومشيت على طول
هادا كل إلي صار معايا انشالله أكون أفدتكم وبالتوفيق للجميع
تروبيكانا April 4th, 2007, 09:15 AM
7 "
شكراً ....