الطريقه السليمه للتحويل من اجازة استثنائيه الى ملحق للعسكري

على ماعتقد اخوي النقطه الثالثه اخلافك فيها .. فيه كذا شخص خلص لغه وجاب قبول جامعه ونظم للبعثه دون اي شروط ... لكن تكون المشكله في الاجازه الاستثنايه من عملك يعني مثلا لو دخلت جامعه يغالك اقل شي ثلاث سنوات من غير فترة اللغه يعني المجموع خمس سنوات ونصف تقريبا اذا باكلوريا او ماستر يمكن تكون هناك المشكله والاجازه الحد الاعلى اربع سنوات ..

بنسبه لتحويل صعبه شوي من الاجازه الاستثنائيه الى ملحق ... الامر واضح وصريح ... حتى الاغلبيه اللي كانو قبل سنه ملحق وبغى يجدد الالحاق تم رفضهم وصدر لهم اجازه استثنائيه ... يعني انسى موضوع التحويل ..

حبيبي خالد ابن عمي فصل من دوامه عشان يكمل دراسته وانا حالياً مرافق مع زوجتي ولا لي الا لغه فقط اما على ما اعتقد واعتقد خذ الكلام من ارض الحدث ^_^ وبالتوفيق للجميع وانا مازال عندي امل ان اقدر احول من اجازوة استثنائيه الى ملحق بحكم اني عسكري .

يعطيك العافية أخوي

بالنسبة للتحويل من إجازة إستثنائية إلى ملحق .. هذي صعبة إن لم تكن مستحيلة ..

لأنهم ماحطوا نظام الإجازة الاستثنائية إلا عشان يوقفون الالحاق ..

وعشان يضايقون العسكريين ويضغطونهم أكثر من الضغط اللي هم فيه ..

كان أول يستلم راتبه وخدمته ماشية وأقدميته .. بس مايدرس ولا له تأمين طبي ..

قالوا نخليه يدرس ونعطيه تأمين طبي ومكافاة مرافق بس نوقف خدمته ونوقف راتبه وأقدميته .. عشان اللي تهمه وظيفته وخدمته وأقدميته يقول لزوجته أركدي بلا بعثة بلا كلام ثاني ..

وعشان يقللون أعداد الملحقين العسكريين اللي صاروا كثير ولا دوام ولا غيره ويأخذون رواتب وهم في بيوتهم لا دراسة ولا غيره ..

أنا ملحق عسكري حاليا .. ولما رفعت طلب تمديد إلحاق .. رفض قائد الوحدة يقول إجازة إستثنائية .. قلنا الشكوى لله ..

فيه قادة وحدة يقبلون تمديد الإلحاق .. وأنا سألت ناس في الملحقية العسكرية .. قالوا كل شيء يعتمد على قيادتك إذا وافقوا على تمديد إلحاقك ماراح ترفض لا الملحقية ولا إدارة الملحقيات ..

لكن بالنسبة للتحويل من إستثنائية إلى إلحاق .. هذي فيها صعوبة شوي .. لأنك لازم تلغي إجازتك الاستثنائية أول لأن معلوماتك في الحاسب تكون موقفة وقت إجازتك كأنك مفصول .



أما بالنسبة للدراسة بعد اللغة للي معاه إستثنائية نعم أخوي مثل ماقلت .. مايحق للعسكري اللي مرافق ومعاه إجازة إستثنائية سوى دراسة اللغة فقط أما الجامعة مايقدر يدرس إلا في حالة فصله .. أو موافقة جهة عمله على التحويل من إجازة إستثنائية إلى إجازة دراسية .. أو يحول إلى مبتعث رسمي على حساب وحدته وقيادته ووقتها الملحقية الثقافية مالها شغل في ميزانيته ...

أما اللي يقول إن فيه ناس درسوا بعد اللغة وهم إجازة استثنائية ..

أحب أقول له إن الاجازة الاستثنائية ماكملت سنة باقي من أقروها .. يعني مااظن أحد أمداه يخلص اللغة ويدخل الجامعة .. إلاا في حالة إنه كان معاه لغة قوية من قبل يجي لبلد البعثة .. ولو يتاكد منهم يلاقيهم في الأحوال طالب أو متسبب ..

لأنه ماراح يوافقون له وهو استثنائية وهذا كلام من وزارة التعليم العالي رسميا .. إلا إذا كان له واسطة عن الملحق الثقافي وسمح له يدرس


واعتذر عن الاطالة

من جدكم تتكلمون ان المرافق العسكري او المؤظف مايدرس ؟

اتمني تعطونا كلام موثوق لان نظام الحاق مرافق بالبعثة واضح حسب موقع الملحقية الثقافية بواشنطن ؟

شروط إلحاق مرافق بالبعثه
1- صورة بطاقة الأحوال المدنية للطالب أو صورة دفتر العائلة للطالبة.
2- صورة آخر مؤهل حصل عليه الطالب أو معادلتها إذا كانت صادرة من خارج السعودية .
3- ما يفيد بإنهاء مرحلة اللغة.
4- صورة من قبول أكاديمي صريح (غير مشروط) محدداً فيه الدرجة، التخصص و بدء الدراسة.(إذا درست الفصول السابقة يرجى إرسال الدرجات).
5- صورة جواز السفر+ فيزا سارية المفعول + آخر I-94 + ختم الدخول(واضح) +i-20 + صورة جواز المبثعت الأساسي .
6- صورة من قرار (الإيفاد / الإبتعاث) للمبتعث الأساسي .
7- قرار إجازة المرافقة للموظف.
8- المدة المتبقية على بعثة المبتعث الأساسي أكثر من 6 أشهر.
9- يجب أن تكون الدراسة بنفس المكان المتواجد به المبتعث الأساسي.
10- للموفدين : إفادة من جهة عمل الموفد بأنه على رأس العمل .

المرافق العسكري واللى طالع اجازة استثنائيه يدرس بس لغه مثلي انا بالضبط الأن بدرس لغه فقط

بالنسبه للملحق انا ماعندي فكره عنه بس من اسمه ملحق يعني تلتزم بعملك ملحق تداوم في الملحقيه التابعه لعملك في الخارج

وبالتوفيق للجميع والله يسهل امور العسكر بخصوص ايقاف الراتب وايقاف الخدمة لأنه ظلم في حق العسكري اللى يمثل امن الدوله واخر شي يطلع ولا يلقى الا لغه وباقي البعثة جالس

أخوي الكلام هذا مؤكد .. العسكري المرافق ومعاه إجازة إستثنائية مايحق له إلا يدرس لغة فقط ..

وبإمكانك إرسال رسالة للمشرف الدراسي للمبتعثة وتتأكد ..

وحتى لو كان مسموح ..

الإجازة الإستثنائية مدتها أربع سنوات كحد أقصى طوال خدمتك العسكرية ..

والزوجة بتكون مبتعثة غالبا للماجستير + لغة ..

لنفرض إنه اللغة أخذت سنة ونص .. والماجستير سنتين ونص هذي الأربع خلصت ..

وأنت لنفرض درست اللغة في سنة ودخلت جامعة بتدرس ثلاث سنين مستحيل تخلص فيها البكالريوس حتى لو درست أترام صيفية ..

الموافقة على الدراسة راح تفيد العسكري اللي معاه البكالريوس ويحتاج يكمل ماجستير فقط .. أما اللي بيدرس بكالريوس مستحيل يخلصها في ثلاث سنوات إلا اذا كانت لغته ممتازة قبل يبدأ البعثة ويدخل الجامعة مباشرة ..

والله يوفق الجميع

البكالوريس الي مقدم عليه ٣ سنوات فقط وجامعة موصي فيها من التعليم العالي ولامور تمام ؟

وسنة لغة ..

تصير اربع سنوات وحتي لوبقي علي ترم بامكاني اقدم اعتذار

و ارجع واخذ اجازة خارجية شهرين واطوف عليها شهرين مافي اي مشكلة ؟

لكن سالفة انهم مايدرسون هذي مشكلة ؟ انا الي اعرفة انه من شروط الحاق بالبعثة ( اجازة استثنائية ) ؟

والي الان ماجبتوا لي كلام موثوق انا علي من شروط الحاق بالبعثة الموجود في موقع الملحقية ؟

الا اذا تقولون ان موقع الملحقية ماعندة سالفة هذا شي ِثاني ؟

سلام

وش جاب طاري الملحق ؟

اقول شروط الملحقية في واشنطن بخصوص الحاق مرافق بالبعثة

الله يعطيك العافيه

لو ترجع للتعهدات اللي يوقعها المرافق لما يجي يسوي طلب إلحاق مرافق بعضوية البعثة ..

تلاقي أول شرط

01 لا أعمل في أي جهة حكومية ولست مبتعثا من أي جهة أخرى .

أتوقع هذا الشرط يوضح لك هل يسمحون أو لا .