September 24th, 2008, 03:47 PM
بسم الله الرحمن الرحيم
هذه تعتبر من أولى المشاركات لي في المنتديات بشكل عام..وماذاك الا بسبب قلت زيارتي لها لعدم حاجتي.
وأشارك هنا لأني أستفدت كثير – ومازلت- من هذا المنتدى في التحضير لسفرتي لأمريكا..ومن باب "هل جزاء الاحسان الا الاحسان" أسرد قصتي كاملة وتحضيراتي للفيزا الامريكية ليستفيد منها الجميع..
ماطول عليكم وبقلب بالعمي بعد..وقبل ما أنسى حاب أشكر جميع من كتب وشارك في هذا المنتدى واللي أفادني وأفاد الجميع..والله يجزى الكل خير..
نبدأ القصة..
هذا سلمكم الله ..أنا طالع لدراسة الماجستير في التسويق على حسابي في أمريكا..وأول تحدي أمامي هو الفيزا الامريكية..وهنا أوضح اللي سويت عشان أعدي هذا التحدي..
- حرصت إبتداء على قراءة الخبرات السابقة في هذا المنتدى الغالي وإستفدت منها - حرصت أيضا على قراءة كل طلبات السفارة من موقعهم وبذلك أصير متأكد من إني أشتغل على أساس معلومات صحيحة وساعدتني اللغة ( إذا ماعندك لغة، فألتفت يمين يسار أكيد بتحصل أحد وأعضاء المنتدى ما يقصرون) - طبعت لستة بالأشياء المطلوبة وبدأت أشتغل عليها وحدة وحدة..ذكرها بعض الشباب هنا في المنتدى )( واللينك هذا يدلك عليها بالانجليزي من موقع السفارة (للأسف ما حصلت شيء بالعربي). - الطلبات كلها سهلة، أهم اثنين بالنسبة لي كانا (I-20) والضمان المالي. - الأهمI-20 .. بحكمي طالع للدراسة صار لازم أجيبه..بعد التفكير وبحكم إني مستعجل على السفرة..قلت مالها الا أجيب من معهد لغة وبنفس الوقت أراسل الجامعات على الـ(online) وبكذا أقدر أحجز موعد للمقابلة بحكم معاي (I-20) وأثناء المقابلة أذا سألوني وريتهم مراسلتي للجامعات (وبالفعل هذا اللي حدث..بس ما سألني القنصل عن مراسلة الجامعات). - خلصنا من زحمةI-20 .. وبقى الضمان المالي..سالفته بعد الحمدلله تسهلت..فزّعت الشباب ودفوا برصيدي 110,000 ريال وطلعت فيها شهادة بنكية بالانجليزي..وهنا أنتبهوا يا جماعة فرق بين الشهادة البنكية والضمان المالي..الشهادة البنكية تقولهم باختصار عندي كذا في حسابي..يعني توريهم إنك إنسان كاش..أما الضمان المالي فمن خلاله البنك يحجز على المبلغ وكذا بتروح عليك..المهم إن الضمان المالي ما أخذ يوم الا والبنك يقول تعال إستلمه..وما إستلمته الا سحبت الفلوس ورديته لأصحابها..تخبرون السالفة فيه فلوس والواحد مايضمن يمكن أتخمه ويطلع له هوندا أكورد لؤلؤي من ظهر غيره 
. كذا خلصت من أهم طلبين وبقيت الاجراءات العادية مثل رسوم السفيس ورسوم بنك سامبا وتعبئة الفورمات..
حجزت موعد بالسفارة عن طريق الموقع بعد ما أنشئت حساب عندهم ودفعت رسومه (ماني متأكد..حوالي 45 دولار).. تحتاجون بطاقة فيزا/ماستر كارد لإنشاء حساب...
من ضمن بحثي حصلت أحد الصفحات الي تعطيني تصور عن أقرب موعد للمقابلة.. إدعس هنا ، وصراحة وجدت إن بعض المكاتب مايدرون وين الله حاطهم، أحدهم قالي أقرب موعد في السفارة بعد ثلاثة شهور ولما شيكت وجدت إنه بعد يومين..متصورين!!!.. الموقع يوضح الوقت لسفارة الرياض وقنصلية الظهران ولازم ما تلخبطون بين الوقت المتوقع لفيزا الطالب وفيزا غير الطالب؛ يعني تلقون 4 أوقات وهي بالترتيب: غير طالب في الظهران، بعده طالب في الظهران، بعده غير طالب في الرياض، وبعده وهو آخر سطر في الموقع طالب في الرياض ... المهم كملت كل الاجراءات والطلبات وحجزت موعد بالسفارة يوم الأحد الماضي الساعة 10.. والسبت اللي قبله دخلت على المنتدى وكتبت أول مشاركة في حياتي في المنتديات أسأل الشباب عن آخر أخبار المقابلات بس عشان يطمئن قلبي.. قدمت إجازة من الدوام يوم واحد عشان أروح وأنا مروق..
يوم السبت بعد ما طلعت من الدوام شيكت على أوراقي قبل ما أنام وتأكدت أنها كاملة، بعد النومة اللي مدري وشلون أفطرت وأنا جالس أدعي إن ربي يسر الأمر والمدام بعد تدعي..وقلبنا في البيت قنوت على الفطور
..في الليل شيكت على أرواق مرة ثانية من زود الوسوسة
.. حاولت أنام..وتقلبت تقلبت وغطيت شوي..مع أني واثق إن أموري تمام وأعصابي رايقة الا إنه كان هم صراحة.. لا أحد يقلق لأن مع الدعاء بتيسر الامور إن شاء الله وترى الدعوة ما تستاهل كل الهم اللي شايلنه لها..صليت الفجر وجلسنا نسولف شوي أنا والمدام..إلى الساعة ستة ونص..اخذت دش ولبست ذاك الكاجول الرايق (يعني بنطلون وشيرت)..وأنواع الجل والعطور..والنظارة فوق الراس وحركت على السفارة..اللي يشوف يقول وش ذا الامريكاني 
... موقع السفارة: حي السفارات- من المدخل الرئيسي تتوجه طوالي وتعدي الدوار الاول والثاني والثالث تلف يمين، وتمشي طوالي تعدي الدوار الاول والثاني (إذا ماني غلطان)تمشي طوالي تلقى عسكر على يسارك هذا هو مدخل مواقف السفارة.
المهم حضّرت عند السفارة الساعة 8 الا شيء بسيط واول ما سويت..عديت اللي قدامي قلت أعشان أقول للحبايب في منتدى مبتعث العدد بالضبط
..لقيت أني أنا السادس..فنصيحتي لكم..تروحون بدري قبل ما يداومون (دوامهم من الساعة 8 الى 5) ولا عليك متى موعدك يكون سواء الصباح أو الظهر..مدام إنك جاي بنفس اليوم، فقاعهدتهم "من سبق لبق" يعني الاولوية لمن بداخل الدوار الشاهد..عشر دقايق..الا والسكيورتي يأشر لي.. بدأت أزف الخطا يمه وهنا..
أنتبهوا معاي.. كويس..
بدأت الإجراءات..
بعدما ما جاء دوري نادني السكورتي في مكتب خارج المبنى ومعه وحدة يظهر أنها لبنانية..شيكت على أوراقي..وقالت أو كي وحولتني على السيكورتي ..السيكورتي سألني عن الاشياء اللي معاي..المحفظة ومفتاح السيارة..أخذ مني المفتاح وحط بظرف وأعطنياه.. خلصت منهم وقفت عند الباب اللي يدخلني على المبنى طبعا ما يدخلونك الا الشخص اللي قبلك مخلص وياويلك يسود ليلك إن كان اللي قبلك راعي طويلة، والله ياأنت بتصهرك الشمس عشان كذا تعال بدري أحسن والشيء الثاني خل الجوال بالسيارة لا تنس والأفضل إن يكون معك الكيس البلاستيك (إبو ضكاك) تحط فيه أروراقك بدل الشنطة لأنهم حساسين من أي شيء..
أنفتح الباب دخلت شيكوا علي من فوق لتحت..نزل البنطلون أقصد الحزام،الجزمة، كل اللي في جيبك.. أخذوا الظرف اللي أعطانيه السيكورتي وأعطوني له رقم بحيث آخذه وأنا طالع من السفارة..مرينا بسلام..& &&حاول إنك تصير خفيف ونزل أي شيء ما تحتاجه مع الجوال في السيارة&&&
قالوا..خلاص.. روح قدام طلعت من المبنى وتوجهت للمبنى الداخلي اللي المقابلة بتصير فيه..
عند المدخل تفتيش مرة ثانية والحمد لله ما كنت لابس الحزام..ونفس السيناريو يتكرر..ومرينا بسلام.
أشرلي من فين أروح دخلت على سيب طويل مشيت معاه لما لقيت مكتب على اليمين فيه بشرية وعلى الباب واقف سيكورتي دخلت في المكتب وأعطاني السكيورتي رقم..في الانتظار فيه واحد جالس على مكتب في الطرف يكمل أوراق اللي مكمل أوراقه، إذا كانت أوراقك كاملة فلا تهتم بوجوده ولا يربك.. في هذا المكتب سلمت كل الاوراق المطلوبة ومن ضمنها (I-20)..صورته الأخت اللي على الشباك يظهر لي أنها سودانية ورجعته لي وأخذت بقية الاوراق وشيكت هي إن أوراقي تمام، وقالت خلاص...
وبكذا أنتهت المقابلة وحصلت على الفيزا.....لا تصدقون أمزح معاكم 
المقابلة اللي شايلين همها هي بعد هذا كله..طبعا تستمر بنفس الرقم وتطلع من المكتب يمين وتجد كراسي الانتظار هناك..وأنت في الانتظار أوراقك اللي أخذتها منك الموظفة تبدأ تدور على الموظفين من داخل لأستكمال الاجراءات..
المهم رقمي كان 225..وجلست أنتظر..مرة أقول بيردوني ومرة إستغفر..ومرة أقول خشتي ماهي خشت واحد بيدرس في أمريكا..ومرة أقول لا الحين بيطلع علينا واحد ويطلعني من بين الناس هذولا كلهم ويعطيني الفيزا.. المهم انواع الوساوس.. بدأ الرقم يمشي وصل 224 قام خوينا ودخل شوي وبعدين رجع..قلت الله يستر بها السرعة..شوي الا نادوا على رقمي بالعربي..قلت بس عربي وحرمة بعد بسوي المقابلة لا يتسرت..وأجيها على الشباك..وأصكها بذيك الابتسامة اللي أجهرتها من النور
..وأقول "جود مورينج"..قالت "جود مورينج".."سيد ناصر نبغى ناخذ بصماتك"..ياحسافة الابتسامة والله، آخر شيء طلعت بصمات وأقلبها تكشيرة لين الضعيفة أنفجعت..ورجعت لمكاني ولوساوسي.. (خاصة إني جالس لوحدي ما حبيت أحتك بأحد على غير العادة)..وأنا أقول لكم صراحة كل واحد يكون بحاله وخلوا عنكم اللقافة بس شوي 
. المهم..جلست أحتري رقمي..وصل 224 وراح اللي قبلي شوي نطوا الى 226 وتشوف أنواع الفجعة..قلت أكيد ألغوا فيزتي وهذا معناه أطلع برا رحت وسألت السكيورتي قال (نورمل..بابر أبس آند دونس)..أووووف الحمد لله وأنا على بالي انها "إطلع برا".. يقول طبيعي إن الاوراق بعض الاحيان تأخر في الاجراءات..ورجعت لمكاني أحتري.. الا رجع الرقم ونط الى 227 ثم 228 ما طرا عليهم الظاهر يرجعون لي..
الا هذا صاحبنا أبو 224 طالع..هاه بشر عسى تيسرت..قال وهو مستغرب رفيوز..قلت ليش..هز راسه ومشى وهو جدا منصدم..رفضوه الله يستر منهم بس..عاد هو شكله دكتور ورايح على مؤتمر..وشلون انا اللي باز بالماجستير..مايمديني أسولف مع نفسي بها السوالف الا والدنيا توقف
ويطلع رقمي ..225..حمي حمي يا ولد جاء رقمك 
دق دق دق.. الا القلب قام يرقل...
قلت بسم الله وقمت..اللهم لا سهل الا ماجعلته سهلا وأنت تجعل الحزن إذا شئت سهلا..يارب يا كريم
وبدات المقابلة.. اللي هي أول تحدي وشيء شايل همه من زمن...أخيرا وصلنا
كان رجل أمريكي طويل شعره أشقر..من خلف الشباك قلت له "جود مورنيج" رد علي بمثلها..وابتسامة إبتسامة خفيفة..
طالع في أوراقي..وسألني السؤال الأول بالعربي المكسر..
سيد ناصر ماسبب زيارتك لماليزيا..
ردت عليه بالانكليزي..السبب الاول كذا والسبب الثاني كذا
لا حظت انها ما اعطى الاجابة وجه..شكله روتين والسلام...
قال لي بالعربي مرة ثاني: رايح تدرس أي شيء بالماجستير
قلت له: تسويق
قال الظاهر إنه يبغى يتعلم عربي بالقوة: مين بسويلك تمويل؟
قلت أنا وعائلتي وسأحول الانضمام لبعثة الحكومة.
كل المعلومات هذه ذاكرها أنا بالاوراق اللي معاه..بس كأنه يتاكد أو كأنه روتين يأديه..
بعد الأسئلة الثلاث هذه..حول إنجليزي وقال لي: "مستر ناصر يو ويل جت يور فيزا إن فوور ويكس تايم"
إلا تشوف الضحكة علي من الاذن للأذن
..خلال أربع أسابيع أبحصل على فيزا..الحمد لله.. وزاد وهو يطلع ورقة وردية: "يو جست نيد تو شيك ذا ويبسايت أفتر توو ويكز تو سند ذا باسبورت" وأعطاني الورقة الوردية..
قلت أهوه..رجعنا
..وسالفة الورقة الوردية والاسبوعين اللي بعدها أشيك على موقعهم عشان أرسل الجواز لهم..للوهلة الاولى انهدت الدنيا بعيني وقلت الله يخلي بريطانيا بس.. بس رجعت له بابتسامة وقلت أوكي..بغيت أسأله ليش 4 أسابيع..زدت وسكت وقلت بس أبلع لسانك أحسن لك.. وأنصحكم ما تسألون إلا إذا كان عندك بديل جاهز غير أمريكا وتبون تخربونها..شكرا لك نايس تاكينج تو يو.. وأودعه بابتسامة..قال لي كلم مكتب الفيدكس الموجود في الركن عشان تنسق معاهم..قلت أو كي شكرا.
أعطاني ورقة حمراء صغيرة..مكتب الفيدكس دبسله لي على آخر الجواز من الداخل..وقال شيك على الموقع حق الفيزا وأرسله إذا طلبوا منك.
هذا بتفصيل ماحدث لي..شاركتكم فيه للفائدة..وأرجو انكم إستفدتم..
ومع إن وضع الفيزا مو واضح..إلا إن واثق بالله سبحانه وتعالى إنها جاية في الطريق..واثق أيضا أنكم بتدعون لي..الحين وعلى فطوركم بعد شوي..وبالتوفيق للجميع
LinkBack URL
About LinkBacks
September 24th, 2008, 03:47 PM
- حرصت أيضا على قراءة كل طلبات السفارة من موقعهم وبذلك أصير متأكد من إني أشتغل على أساس معلومات صحيحة وساعدتني اللغة ( إذا ماعندك لغة، فألتفت يمين يسار أكيد بتحصل أحد وأعضاء المنتدى ما يقصرون)
- طبعت لستة بالأشياء المطلوبة وبدأت أشتغل عليها وحدة وحدة..ذكرها بعض الشباب هنا في المنتدى )( واللينك هذا يدلك عليها بالانجليزي من موقع السفارة (للأسف ما حصلت شيء بالعربي).
- الطلبات كلها سهلة، أهم اثنين بالنسبة لي كانا (I-20) والضمان المالي.
- الأهمI-20 .. بحكمي طالع للدراسة صار لازم أجيبه..بعد التفكير وبحكم إني مستعجل على السفرة..قلت مالها الا أجيب من معهد لغة وبنفس الوقت أراسل الجامعات على الـ(online) وبكذا أقدر أحجز موعد للمقابلة بحكم معاي (I-20) وأثناء المقابلة أذا سألوني وريتهم مراسلتي للجامعات (وبالفعل هذا اللي حدث..بس ما سألني القنصل عن مراسلة الجامعات).
- خلصنا من زحمةI-20 .. وبقى الضمان المالي..سالفته بعد الحمدلله تسهلت..فزّعت الشباب ودفوا برصيدي 110,000 ريال وطلعت فيها شهادة بنكية بالانجليزي..وهنا أنتبهوا يا جماعة فرق بين الشهادة البنكية والضمان المالي..الشهادة البنكية تقولهم باختصار عندي كذا في حسابي..يعني توريهم إنك إنسان كاش..أما الضمان المالي فمن خلاله البنك يحجز على المبلغ وكذا بتروح عليك..المهم إن الضمان المالي ما أخذ يوم الا والبنك يقول تعال إستلمه..وما إستلمته الا سحبت الفلوس ورديته لأصحابها..تخبرون السالفة فيه فلوس والواحد مايضمن يمكن أتخمه ويطلع له هوندا أكورد لؤلؤي من ظهر غيره
حجزت موعد بالسفارة عن طريق الموقع بعد ما أنشئت حساب عندهم ودفعت رسومه (ماني متأكد..حوالي 45 دولار).. تحتاجون بطاقة فيزا/ماستر كارد لإنشاء حساب...
سيد ناصر ماسبب زيارتك لماليزيا..
ردت عليه بالانكليزي..السبب الاول كذا والسبب الثاني كذا
قلت له: تسويق
قلت أنا وعائلتي وسأحول الانضمام لبعثة الحكومة.