اتـــــــــــــــــــــلانــتــــــــــــا atlanta

الله يجزاك خير اخوي عكس التيار .. ومانبي الا دعواتكم الله يسلمك..

اخوي الغالي ضياء.. اعذرني على الخطأ المطبعي <<< والله مهوب مطبعي بس ماقول الا يالله حسن الخاتمه بصراحه ماعاد صرت اجمع.. بس بلاشك غير مقصود.. وترا مهوب انت لحالك وتسير لي كثير .. بس مو مشكله بنت ولد كلنا اخوان واخوات والكل على العين والراس..

أخوي أنس

بعد السلام والتحية
أرجو الافادة عن جامعة جورجيا تكنولجي كجامعة وليس كمعهد من حيث ترتيبها
الشي الثاني ضروري نسير على الملحقية كمبتعثين جدد ولا نكتفي بالاتصال وارسال الاوراق بالبريد لفتح ملف المبتعث

مافيه شي ببلاش كل سؤال بدعوة

بالتوفيق يابش مهندس

والله اخوي سامي جورجيا تيك مهوب انا الي اقيمها ولا حتى غيري.. والجامعه اذا جاك منها قبول فهذا يعتبر شهاده كبيره بحد ذاتها لان قبولهم جدا صعب .. وطبعا انا اتكلم في التخصصات الهندسيه والتكنلوجيه.. وفي الاسفل يتكلم عن تقييم الجامعه :

GT | Tech Receives Highest <em>U.S. News</em> Ranking Ever

يارب تستاهل الاجابه دعوه..

اما بخصوص السؤال الثاني ودي اتفلسف عليك واخذ دعوه ثانيه بس اخاف بعدين تدعي علي فخلنا في السليم.. وبصراحه ماعندي علم وانا اخوك .. ولو اني مكانك مستحيل اسال طالب والسؤال هذا لازم تساله للملحقيه نفسها او وزاره التعليم العالي.. فهذا سؤال ماله داعي المغامره فيه ..

وموفقين واياك يااااااااارب..

ياجماعه الرسائل الخاصه حقتي ماتشتغل ولازم يكون عندي عدد مشاركات اكثر من 30 .. فماقدر ارد عليكم على الرسائل الخاصه هذا اولا.. الشيء الثاني: ياليت الي عنده استفسار يضعه هنا علشان الكل يستفيد الا اذا فيه شيء يتعلق بخصوصيته.. بس غير ذلك الرجاء وضع اسئلتكم هنا حتى تتحقق الفائده المرجوه ويستفيد الجميع..

عموما انا جاني سؤال على الرسائل الخاصه وهو كالتالي:

طبعا افضل شيء تسويه انك تذهب الى موقع ذبيحه .. هذا راااائع جدا ويطلع لك اقرب ماركت تبيع اكل حلال عند بيتك .. وبرضو المدارس ومحلات البزنس والمطاعم الاسلاميه.. وهذا الرابط الي يتعلق باتلانتا :

zabihah.com - your guide to halal eating

وانا بصراحه لما كنت ابغى شيء اسلامي وعربي ومحل يكون كبييييير وكل الاشياء الي ابغاها احصله فيه فاروح لمحل اسمه المدينه اذا انا مو واهم على شارع جيمي كارتر مخرج 99 .. يعني وانت طالع من اتلانتا وماسك 85 شمال ويجيك مخرج 99 تلف يمين من الاشاره وبتكون ماسك جيمي كارتر المحل بتحصله على يسارك وهو مره كبير والمواقف الي قدامه ساحه كبيره .. فهذا انصحك فيه تتقضى مقاضي كثيره حقت شهر مثلا .. فمررره روووعه ..

واتمنى قدرت اجاوب على سؤالك اخي الكريم،،،

عندي سؤال للاخوان الي عندهم خبره في اتلانتا

ايش افضل الطرق في التنقل خاصه الفتره الاولى

الوصول الى المطار

المرحله الثانيه الذهاب الى المعهد
المرحله الثالثه
البحث عن سكن

هي التاكسي او استئجار سياره او او

وماهي متطلبات ذلك

تحياتي

والله اخوي عكس التيار اذا هي المره الاولى لك في امريكا .. فمانصحك كذا على طول تجي وتستأجر وتسوق .. يبي لك تعرف نظامهم .. لان اكثر السعوديين الي يجونك يحسبون النظام نفس السعوديه .. وتلقاه اذا وقف في الاشاره وخضرت وهو ناوي يسار لف بالدركسون وراح .. وطبعا هذا في امريكا غلط انك تلف يسار والاشاره خضراء وماعليها سهم للي بيروح يسار.. فالي عليك تسويه انك تصبر انك تدق اشاره يسار وتنتظر السيد الثاني مافيه سياره ماره وتلف .. وقس عليها اشياء كثيره والستوب ساين وغيره .. الا اذا معك واحد عارف النظام .. بس في البدايه على طول غلط .. وانا انصحك انك تضبط السكن قبل لا تجي او اقل شيء يكون عندك لسته بدال بهذلة الفنادق.. ويفضل انك تسكن عند عائله ولاسباب كثيره :- مافيها عقود وخربطه ونظامهم اسبوعي - تتعلم عن طريقهم القوانين والثقافه الامريكيه- امان اكثر - لغة افضل والظاهر ان التاكسي افضل لك مدامها المره الاولى لك .. الا اذا فيه احد يسنعك.. والسكن تطرقت فيه في الموضوع بالتفصيل .. الا اذا عندك سؤال محدد .. والله يسهل عليك وتوصل بالسلامه..

اخوي انس شكرا لردك

بالنسبه للسكن انا عندي لسته بالشقق والكامبوندات وعندي بعد عناوين الفنادق وتواصلت معاهم

بالنسبه للسكن مع عائله اهو اقتراح جميل جدا ومفيد واتمنى ذلك بس للاسف انا معاي زوجتي

وعلى قولتك ( في احد يسنعك ) للاسف لا مافي احد وهي المره الاولى فعلا واعتقد فكرت التاكسي كويسه واعتقد انها مكلفه ايضا
......

وفكرت اني اعمل ترتيبات السكن قبل ما اجي لكن لقيت من الصعب ارتبط في شي انا ماشفته
بعيني وحكمت على المكان

تحياتي لك اخوي انس

اتمنى من المسؤل تثبيت الموضوع

تسلم لي والله على هالمعلومات ..
لأني بصدد زياره سريعه لأتلانا .. و أنا من النوع اللي يحب يستغل أبسط الفرص ..

الله يعطيك العافية يا باشمهندس :P

اذا ماني ملخبط شايفك في منتدى ثاني وشبيه للموضوع

الله يعطيك العافية لحبك لاخوانكم ولحرصك عليهم

على العموم ..

معهد جورجيا تك .. كيف اقدر اتواصل معاهم ..

ماني عارف اوصل للمعهد كل الي قدرت عليهم في الويب سايت تبعهم اني شفت الكليات

ياريت تقولي كيف اقدر اتواصل معاهم او لو في لهم موقع يوضح الاسعار

لانه وبصراحة ناوي ان شاء الله اطلع شهرين .. في اكتوبر ان شاء الله

منها اكون اتخرجت بالبكالوريس ان شاء الله .. وفي العمل عندي اقدر اسحب اجازة شهرين