توضيح اكثر عن حالة الطالبين المسجونين في تامبا في ولاية فلوريدا

السلام عليكم ورحمة الله وبركاته
أولا هذا خبر مهو طيب بالنسبة لنا وندعو الله انه يطلعهم سالمين بأقرب وقت.

عموما أنا أعرف الطالبين شخصيا, معرفة قوية والشهادة لله انهم على خلق و طاليين محترمين وعلاقتهم ممتازه مع الكل سواء المدرسين أو الطلبة وحتى برا الجامعة علاقتهم جيدة مع الطلبة الأمريكان اللي ساكنين معهم.

الطالبين حريصين على تعلم اللغة بأسرع وقت وهذا السبب وراء تغيير مانع لسكنه قبل اسبوعين أنا ومانع كنا ساكنين بنفس السكن من جينا أمريكا بشهر يناير الماضي وكان عقدنا ينتهي ب 6 مايو وماصدقنا على الله يجي هاليوم اللي نترك فيه هالسكن لأنه كان سكن سيء .... كل السعوديين الي كانوا فيه طلعوا لأماكن ثانية...المهم مانع كان ناوي يطلع لشقه مع واحد من أخوياه السعوديين بس بعدين شاف ان هذا مهو من صالحه ( من حيث سرعة تعلم اللغة وهو حريص يخلص اللغة بأسرع وقت ) عشان كذا طلع لسكن نسبيا بعيد عن الجامعة وكل اللي فيه طلبة أمريكان ( ماأتذكر ان فيه طلبة عرب ) وكان هدفه التعرف على طلبة أمريكيين والاحتكاك فيهم وتطوير لغته.... بالنسبة لشاكر هذا اساسا كان ساكن مع 3 أمريكان وعلاقته فيهم ممتازة جدا جدا. ساكن معهم من يناير وعقده ينتهي بشهر أغسطس والرجال ناوي يجدد عقده بسكنه الحالي الى ان يبدأ الدراسة الجامعية وقتها ممكن يطلع لسكن خاص فيه. أنا سبق زرت شاكر بالشقه أكثر من مره وشفت كيف ان الامريكان اللي معاه مبسوطين ومرتاحين منه... حتى ان فيه واحد من الأمريكان دايما ياخذ شاكر معاه بسيارته يروحون يتمشون ولا يتعشون سوا.

الطالبين زي ماقلت من شوي على خلق وغير كذا فيهم خفه دم, خفة دم بأوقات المزح وجاديين وقت الجد... وأحيانا نروح نلعب كورة مع بعض بملاعب الجامعة... يعني من معرفتي بهم للثلاث الشهور الماضية مالقيت عليهم أي شي ... شهادة لله مهي مجاملة لهم.

بخصوص اللي حصل قبل أمس... أول شي الكفالة 250 دولار وليست 250,000 دولار ... هذا من حيث المبدأ.

ثانيا: أتمنى انه مايفسر ركوبهم للباص بشكل سيء لأني أعرف انهم اكبر من الكلام هذا.... أكيد هم ركبوا الباص ويعرفون انه باص مدرسه مهو باص الجامعة ( باصات المدارس كبيرة ولونها أصفر بينما باصات الجامعة أصغر ولونها أخضر ) بس انا الى الآن ماني عارف بالضبط ليش ركبوا الباص اذا كانوا ناويين يروحون للمدرسة الثانوية لأن كان بامكانهم اخذ باصات مدينة تامبا ( الباصات الحمراء ).

عموما فكرة الذهاب لمدرسة مهي شي غريب.. أنا أعرف اثنين سعوديين راحوا لمدرسة بحثا عن عوائل أمريكية بغرض الإقامة معها ووعدهم مدير المدرسة انه يحصل لهم بس بالأخير مالقى لهم شي للأسف... وهذي مشكلة نواجهها هنا بتامبا, أقصد ندرة العوائل اللي تستضيف طلبة ... من أصل حوالي 90 طالب بالمعهد ما أعرف الا ثنين حصلوا عوائل ... واحد منهم يسوق كل يوم حوالي نص ساعة من عايلته الى الجامعة. غير كذا فيه بعض المدارس تعمل معارض وتكون مفتوحة للعامة يجون يشوفون الأشياء اللي عملها الطلبة, اللي أبي أوصله ان زيارة مدرسة مهي جريمة ولا شي يسود الوجه عشان الناس تفكر غلط او تسيء فهم تصرف الطالبين.

أنا متابع موضوعهم عن قرب مع أثنين يقربون لهم هنا .... وبإذن الله أكون أول واحد يبشركم بخروجهم من السجن.

قبل ماأخلص حاب أقول لكم أن المعلومات الأكيدة اللي عندي انهم الان مع بعض في السجن في غرفه وحدة ... يعني الحمدلله مهم متروكين مع باقي السجناء ومعنوياتهم عالية... وانشالله تنتهي مشكلتهم يوم الثلاثاء. ويارب يوم الاربعاء يركبون باصات الجامعة الخضراء ويروحون الجامعة ويدرسون معي وبقية زملائهم وأغديهم با Sub Way ..... آمين

أخوكم مشعل تامبا - فلوريدا

منقول من ملتقى الطلبه في فلوريدا http://www.sa-sf.com/sa-student/show...6&page=2&pp=10