أنا ماادري ليه الانجليز اذا سمعوا طاري السعودية ينطلقون بالسواليف والأسئلة
لا واغلب المواضيع اللي يحبون يتكلمون قيادة المرأة والحجاب
اول ماجيت ساكن عند عائلة وجالس أسولف معهم وسئلوني : صحيح بالسعودية المرأة تغطى بالكامل ؟ قلت وانا متحمس شوي : ييس .. لان المرأة عندنا مثل الجوهرة ليس اي شخص يصل اليها ... وانا رافع يديني ومندمج بالوصف . واناظرهم والا الشايب وعجوزه مطيرين عيونهم ومنصدمين من اول ماقلت ييس . قالوا : وآي ؟ قلت : قلتلكم ان المرأة عندنا مثل الجوهرة ونحفظها ... (مدريت ان الاتصال انقطع بيني وبينهم ... :(
بس بصراحه بذاك اليوم حسيت بغثيان ونظرات تعجب مع استهجان رغم أني كنت دبلوماسي ومسوي اعرف اجاوب. ههههههه
وغير كذا في المعاهد المدرسين يحبون يتكلمون معنا عن السعودية من ناحية الدين والثقافة وياليت انه حب تعرف واطلاع المشكله أني ألاحظ عليهم نظرات الاستغراب مع سخرية ولمز وتعليق بالكلام احيانا ً
لذلك قررت من فترة بمايلي : ( ممكن توافقوني الرأي وممكن نختلف عادي تراني اوبن مايندد)
- ( عدم النقاش معهم في هذي المواضيع )
والمدرس اللي يقول أنا ولد الانجليزية اللي يفتح معي موضوع في السياسة والدين والثقافة بعد لأني طالب يدرس مهوب طالب حرش . بالاضافه أني اكتشفت أني رايح أبطي عظم عشان يفهموني او افهم عليهم وهالمواضيع متشابكة وحساسه بسبب الفارق الكبير بين الثقافتين الاسلامية والغربية .
مرة بكلاس سبيكنق تناقشت المدرسه مع سعودي عن قيادة المرأة للسيارة والشاب وده بالطيب والصورة الحلوة للسعودية بس لغته ماتساعد وكان اذا جاوب على سؤال فتح على نفسه ستمية سؤال ومدخل وبالبداية المدرسه كانت تسأل ثم صار الطلاب الأجانب يطمرون من يمين ويسار وابتلش بعمره ومرات أحاول أملح له واصحح ومرات مايمديني . بالنهاية قاطعتهم وتكلمت معه بالعربي قدامهم قلت : الله يجزاك خير ياخوي بس ترا لغتنا ماتساعد ولا بريال وهذي مواضيع حساسه تحتاج لغة قوية عشان يفهمونك صح ثم وجهة الكلام لهم بالانجليزي اننا مجرد طلاب ولغتنا بسيطه ويمكن يتسبب هذا بالفهم الخاطئ لنا ولكم قالت المدرسه : نو نو يو آر دوينق ويل .. قلت بنفسي : لايكثر بس مبسوطه تحشرينا بالاسئله وحنا مثل الضب اللي ضيع جحره
ثم من قال أني واحد من اللي سووا النظام السعودي عشان اعرف مثلا ليش ممنوع قيادة المرأة
قبل كنت أتأمل ان اللي اجاوبهم يمكن يكون مهتم بالإسلام وجايز يدخل الدين ويسلم على يدي بس اكتشفت ان اكثرهم يقلب 180 درجه بعد مااجاوب على أسئلتهم وبعد ماكانت أخلاقه عسل صار يكش مني وينظر لي بنظرة ارتياب على خوف مع ازدراء على مدري وش
لذلك هم يهتمون بسبب الفارق الكبير بين حياتنا وحياتهم وليس إعجاب او حرص كما يظن البعض
ومن وجهة نظري ان افضل صورة ممكن اقدمها واخدم فيها بلدي هي حسن الخلق وهذا افضل بكثير من أني ادخل مع الجنسيات الأخرى في نقاشات و شيل أبوك وحط أبوك ... :)
تحياتي وشكري لكم لاستماعكم لفضفضات كانت تقرقع بصدري من فترة
*