استفسار متطلبات اصدار رخصة قيادة في بريطانيا-ويلز

الخطوات
اولا تتجه لاقرب بوست اوفيس منك وتاخذ فورم التقديم على الرخصه البروفيجنال وتعبيه وتوقع بالاسفل(التوقيع بالاسفل يجب الا يتجاوز المربع المخصص....يعني لو مثلا شخطت شخط طلع عن المربع راح ترفض الرخصه) بعدين ترفق جوازك الاصل ومبلغ 50 باوند وتطلب ارسالها ارساليه مسجله عشان فيها اشياء مهمه وترسلها لعنوان الDVLA وهو مبين عندك بالفورم

بعد كم يوم تقريبا اسبوعين راح يرجع جوازك همن بعدها بيوم ولا يومين راح تجيك الرخصه المبدئيه اللي هي البروفجنال .....

اذا وصلك الرخصه البروفجنال اللحين تقدر تحجز امتحان نضري اللي هو (theory test) وتحدد مكان وتاريخ الامتحان وبعدها تشتري لك سيديات تدرس فيها تحصلها بكل مكان في التيسكو واالاسدا والwh smith

اذا دخلت الامتحان ونجحت ان شاء الله.... تقدر تحجز امتحان تطبيقي اللي هو (practical test) واول ماتحجز تدور لك على مدرسة تعليم قيادة وتاخذ عندهم كم ساعة قياده وهم بيعلمونك كل شي عن الامتحان وكيف تتجاوزه.....

بمجرد انك امتحنت العملي ونحجت بنفس اليوم تقدر تسوق نضامي ميه بالميه وحتى لو ماستلمت الرخصه االنهائيه اللي هي (full licence ) لانه بيعطيك شهادة اجتياز تخليها معك لين تستلم الرخصه النهائيه

وتم

وبالتوفيق

اي شي مافهمته قلي

جزاك الله خير يابوجبل

ماقصرت، كفيت و وفيت!

عندي سؤال بعد لو تكرمت، هل اقدر اسوق خلال فترة التقديم، على البروفيشنال؟ و بعد الحصول عليها؟ يعني قبل الفول لايسنس؟

و الله ييسر امورك ياخي و يرفع قدرك بالدنيا و الآخرة

تقدر بشرط يركب واحد معك معه رخصه كامله وعمره مايقل عن 21 ومعه الرخصه 3 سنوات واكثر......هذا نضاما
لكن اذا مضطر تسوق سق بهدوء ولا تلفت النضر لك يعني لاتسرع ولا تقطع اشارات وانتبه للشارع زين وان شاء الله ماعليك الا العافيه.....انا سقت سنه كامله بعد مانتهت الدوليه وقبل ماطلع الفل وماجاني شي حمد الله.....وفيه بعض الزملاء انصادوا .....يعني اذا اضطريت سق واذا قدرت تمشي امورك بدون يكون افضل واريح لك نفسيا

جزاك الله خير ياخوي يابوجبل

الله يكثر من امثالك

حياك الله اخوي .....اخر نصيحه انتبه زين وانت تسوق خصوصا الكميرات حقات السرعه لانهم جاديين مرررره مررره بالموضوع ذا وماله داعي تروح النقاط حقت الرخصه حقتك قبل ماتاخذ الفل

والله يوفقنا وياك وييسر امرك

سلام عليكم شباب
انا عديت الاختبار النظري وابغى احجز العملي لازم اخذ دروس مع اني لي سنة اسوق هنا وايش المطلوب عشان اختبر
بسيارتي

ارجو المشاركة في الموضوع

مبتعث..... اول شي احجز العملي بعدين خذ دروس خلال الفتره الى الامتحان غالبا تكون شهر المده او حوله.....انصحك تاخذ يوم سبت لان الشارع بيكون فاضي اريح لك بس المبلغ بيزيد شوي تقريبا 75 باوند ....بعدين خذ لك كم درس 3 او 4 على حسب عاد...اهم شي هو يبي يعلمك كيف تجتاز الامتحان وليس كيف تسوق لانك تعرف تسوق اصلا......ونصيحه لاتاخذ مدرب براذر هندي ولا باكستاني خذ لك واحد انجليزي انجليزي اضمن لك وينصحك لك .....

الله يعطيك العافية اخوي على المشاركة