تقريري من بريطانيا

February 15th, 2009, 04:17 PM

السلام عليكم
الحمد لله وصلنا بالسلامه . كانت رحلتنا يوم الاربعاء 11 فبراير انطلقنا الساعه اثنين و ربع الظهر و بس صرنا في الجو الناس بدأت تنام و المقاعد الموجوده في الوسط صارت سرر كل واحد يشيل يد الكراسي إلي في الوسط و ياخد مخده و غطا وينام كأنهم شاربين منوم . ناكل وهم نايمين نشرب كمان نايمين ماشاء الله الظاهر خبره في الرحلات . المهم أكلنا مرتين في الطياره وشربنا قد ماتبغوا و الحمام طابور و وبعد ست ساعات و اربعين دقيقه وصلنا لندن بس بسبب الزحام انتظرنا ربع ساعه في الطياره و بعدها نزلنا مشينا لحد ماتعبنا يعني على قد جلستنا الست ساعات . و انا و أخوي ورا الناس مكان ما يمشوا . وصلنا مكان الجوازات و البريطاني يخفف دمه يقول انت ليش جايه قلت أدرس قال طيب اي ماده قلت فيزياء طبيه و قاعد يضحك عليا شافني شكلي صغير مره على الماستر و قال طيب فين راح تدرسي الجامعه قلت ماعندي جامعه بس معهد . كل هذا و ما طلب اي ورقه لا معهد ولا اشعه و لا شي . المهم وصلنا مكان الشنط و انتظرنا بس ماجات الشنط و بعدها كانت الكارثه قالوا باب العفش حق الطياره ما بينفتح وانتظروا ممكن شويه يفتح و انتظرنا 3 ساعات و الناس مشيوا لأنهم طلبوا من الناس يكتبوا العناوين في أوراق و المطار يوصلها لبيتهم و اختكم ماعندها عنوان حتى فندق ماحجزت بس الحمدلله اتنظرنا لحد ما وصلت الشنط. بعدها خرجنا من المطار و كان في تاكسي ارسلوه اقاربنا ينتظرنا المهم خرجنا من المطار و البرد ينشف الواح في مكانه . دورنا على فندق قريب من الملحقية و لقيناه ب150 الغرفه و اسمه شيوك موران هوتل وبعدها لقينا فندق ابعد شوي بس في نفس امتداد الشارع اسمه travelodg kew هذا الغرفه ب65 في اليوم بس ماعندهم خدمة غرف عشان كده رخيص بس ممتاز كل شي متوفر و اي شي تحتاجة تنزل تاخذه بنفسك . ثاني يوم ركبنا الباص من الباب الخلفي للفندق يوقف باصات بس باص 237 و باص 267هي إلي تروح لجهة الملحقية طبعا الباص يوقف عن كل كرسي انتظار للباص يعني اول ماتشوفوا الملحقية تضغطوا على زر stop طبعا راح يوقف بع الملحقية بكم متر عند كرسي الانتظار المشوار تقريبا 4 دقايق من الفندق للملحقية . انا و اخوي ركبنا الباص و ماعندنا تذاكر و اعطينا السواق عنوان الملحقية و شكله شلفنا ضايعين المهم ما أخد فلوس هو المفروض 2 باوند تدفعها لو ماعندك تذكره من قبل طبعا روحه بس و الاوفر تطلبوا تذكره لليوم كله يعني 3 باوند و تركب قد ماتبغى. . تنهوا اموركم في الملحقية و على البنك يسار الملحقية على طول ممكن تعدوا اشارتين و بعدها نهاية الشارع على اليمين في الزاويه البنك طبعا تروحوا مشي و بعدين ترجعوا الملحقية . بس على فكره الملحقية رفضت قبول الوزاره من كابلان اسبكت و قالوا اتوقف و أنا كنت جايبه قبول ثاني أخذوه.و لازم يكون عندكم عنوان اي احد تعرفوه عشان مايرضوا بعنوان الفندق لأنهم راح يرسلوا بطاقة الفيزا بعد كم يوم على عنوانكم.اليوم الثاني نمنا في لندن و اليوم إلي بعد رحنا نركب الباص لكاردف بس و الله الشنط عذاب صار عني عضلات من الشنط ما في غير نجر في الشنط نطلع رصيف و نقطع شارع المهم ركبنا الباص ميغا باص من محطة فكتوريا شخصين ب 28 باوند وبعد 3 ساعات ونص وصلنا و نمنا في فندق ايتاب بس والله مصيبه كرسي الحمام في مكان نطلع المغسله برا و الباب الثاني بعده مكان الترويش و الحمام ضيق اخوي دخل انعزق . وبعدها بيوم غيرنا الفندق ل ibis . وهذا كل شي و بكره رايحه المعهد.

• نشر عبر تويتر
• نشر عبر فيسبوك
• نشر عبر جوجل