باقي 5 أيام على سفري .
أشعر بتوتر وبحزن وبحماس ( كلها مع بعض ) ...
أستيقظ مبكرة وأزور الأماكن التي اعتدت على زيارتها ، أشرب قهوة الصباح بطعم الوداع ..
هل هناك طقوس معينة قمتم بها قبل الرحيل ؟
وكيف كانت "آخر" ليلة في بلدك ؟
عرض للطباعة
باقي 5 أيام على سفري .
أشعر بتوتر وبحزن وبحماس ( كلها مع بعض ) ...
أستيقظ مبكرة وأزور الأماكن التي اعتدت على زيارتها ، أشرب قهوة الصباح بطعم الوداع ..
هل هناك طقوس معينة قمتم بها قبل الرحيل ؟
وكيف كانت "آخر" ليلة في بلدك ؟
هههههههههههههههه لو أقولك يمكن ماتصدقين
انا الفيزا خلصت بس نية السفر تاخرت
يوم الخميس زواج اخوي
الجمعة قررت اسافر
السبت اخذت امر اركاب
فجر الاحد سافرت
بالعربي شنطة ملابس ما اخذت زي الناس , ولا سلمت على كل اصحابي
هههههههههههههه
اتصور مافي احد مثلي
السلام حتى أنا ما ودي أسلم على أحد
يا أخي ضيقة صدر ودموع وكأنه توديع ميت !!
ماني مودعة أحد بس ودي أشوف وش سويتوا أخر الليالي ؟
ودعتم المدينة اللي ساكنين فيها ...؟
والله انا ما انصح ان الواحد يصحى بدري ويشرب القهوة بطعم الوداع على قولك ..
لان ذا بيصعب عليك الأمر صدقيني .. طبعا اكيد الواحد بيحس بوحشه اول ما يجي.. يمكن بعد اول اسبوع او اسبوعين بيحس بملل..
بعدها بيبدا ياخذ عالجو..
من ناحيتي انا اتذكر قبل ما اسافر باسبوع جلست مع اهلي وسلمت عليهم بعدين سافرت داخل السعودية .. يومين بعدين رجعت لهم .. ويوم سفري نمت وماصحيت إلا العشا وطيارتي 5 الفجر .. جلست معهم شويه وسلمت على امي وابوي واخواني واخذت عفشي ورحت المطار :)
ماله داعي تسلمون عليهم لانها بتصير مناحة ههههههههه
خلوها خفافي ازين :)
والحين التجوال مجانا يعني يقدرون يكلمونك متى ما بغو..
الحمد لله يعني موبس انا حالتي صايرة تسدا:)
مع ان انا لي قدامي فترة حتى اخر رمضان عشان السفر...
بس من اول اجراءاتي و الحزن و الفرح قائم...
يوم اخذت الفيزا الامريكية شافتها والدتي-الله يخليها و يحفظها-باركت لي بعدها قلب الجو حزن...
ههههه و قلبت انا بعد حزن من جهة ثانية....
اشوف الحزن الصراحة اننا ماننلام فيه...لان موسهل تترك بلاد التوحيد، بلاد الطهر و العفاف، البلد اللي مابخل علينا بشي من يوم ماولدنا، و اهلنا و احبابنا في الله و تفارقهم و تنقطع عنهم...
كل هذا يستحق الحزن" المؤقت" لكن لا تخليه بطغى عليك و يكسر تطلعاتك بل استفيدوا منه عشان تتفوقون باذن الله تعالى و ترجعون بسرعة و انتم شايلين الشهادة العليا ان شاء الله.
بالنسبة لك يا أختي عن الأشياء اللي ممكن نسويها قبل مانسافر:
- بالنسبة لي ناوي اخلص ايامي و اسافر لمكة و المدينة و ادعي ربي و اتضرع له عشان يوفقني.
-مااخلي احد شايل علي و اخذ من نفسهم و ابذل الطيب معهم لاخر يوم.
"على فكرة فيه ناس الله المستعان يسافرون و لا يسلمون على احد اكثرهم يخافون من العين او مدري اش سالفتهم بس الصراحة الاسلوب هذا بايخ و ماله داعي!...تتخيل زميلك اللي قاعد معك بالمكتب فجأة تسأل عنه خير انشالله ليش مو مدوام؟ يردون عليك خلاص سافر من زمان!"
-اقوم بكل مصالح عائلتي و اقضيها لهم و خاصة امي و ابوي عشان يدعون لي. " خيركم خيركم لاهله"
- اسلم على اصدقائي وخاصة المقربين و زملاء العمل.
هذي اهم الاشياء:)
شكرا على الموضوع و معذرة على الاطالة كانت فضفضة حلوة :)
الله يسهل عليكم السفر.
والله من 3 شهور ونفسي في عمرة أختم بها حياتي هنا ... بس ما كتبها ربي . عندي المال والحجز بس مالقيت أحد يروح معي .
إن شاء الله الإعمال بالنيات .
أنا أنصح أي واحد مبتعث أو مبتعثة ياخذ له عمرة قبل السفر . والله إني كنت أبيها بس قدر الله وماشاء فعل .
اطفش شي في الحياة
احزن شي في الحياة
اللحين اول يوم في دي سي الله ييسرها
مطاردة ورا بنك سامبا والأهلي في الصباح ، دموع وبكاء في العصر مني ومن كل أهلي حتى العاملة المنزلية حضنتني وبكت عليه .
رحنا المطار تأخرت الرحلة الداخلية بسبب المطر !
ركبنا الطيارة الدولية الشاشة اللي عندي وعند مرافقي خربانه والنوم حالف يمين مايجيني ذيك اللحظة !
وصلنا أمريكا إلا ويجيبون لنا ذاك الكلب الوسيم اللي تقولين أسد أكبر كلب شفته في حياتي مرروه علينا وعلى شناطنا وراح ولاكان فيه تفتيش لا لنا ولا لشنطنا !
بس بالنهاية الحمدلله أهم شيء وصلنا بالسلامة .
ونصيحتي لك أختي لاتكثرين شنط وملابس ترا بتتبهذلين في المطارات الداخلية مو عشان الوزن لكن ماعندهم عربيات زي الأوادم وترا أمريكا فيها كل شيء اللي لحد الآن مالقيته تمر ، قهوة عربي ، ملوخية وماعدا ذلك موجود وفي كل مكان وماعليك من ترهيب الناس توكلي على الله .
الله ييسر لكم و يبارك لكم...
بخصوص البنوك...
أنا حسابي بالاهلي و ينزل فيه راتبي بالسعودية لاني كوني معيد مبتعث...
فيه بعض الأمور تقلقني...
يعني مثلا اذا انتهت البطاقة المصرفية تبع البنك الاهلي وش اسوي و انا بامريكا؟
نصحوني ناس بالتوكيل لاحد اقاربي بالسعودية....مارايكم و كيف يتم ذلك؟
وفقكم الله.
اه ه ه ه ه ه ه ه ه بس
انا سفري الاسبوع الجاي
مااعرف ايش اقول..... انا رتبت سفري على وقت سفر اهلي للخارج عشان لااسلم عليهم ولااودعهم عشان لا أبطل السفر واجلس
بالنسبة للطقوس انا محضر كويس مررررره عشان انسى
1 / كل يوم اسمع اغنية نبيل شعيل (تسافر لاخر الدنيا)
2/ قصائد منوعه على سبيل المثال
الليـلـة هــذي واضـحــة لـيـلـة فـــراق
حــاولــت أعـديـهــا وعــيــت تــعــدي
ظــروف مــا تنـطـاق ولا راح تـنـطـاق
صــد الـقـدر مـاهـو بـصــدك وصـــدي
تـعـال خـذنـي بـيــن أيـاديــك مـشـتـاق
قـبــل انـتـفـارق حـــط يــــدك بــيــدي
انا للحين ماستلمة الفيزه وماقررات اكيد اني اسافر كل مافكر اني بترك امي وابوي واخواني واصحابي وسيارتي ااااههه تجيني كتمه كتمه
انا دايما ادفع لهم خمسين ريال و اخذها فورا ماحب انتظر...
اذا دفعتي لهم عادي يطلعون لك ثانية ممكن تقولين لهم انها مفقودة و تاخذين جديدة...
بس انا بطايقي لسة جديدة...فيه اقل وحدة فيها ممكن سنة...
ودراستي المشكلة متواصلة ع الاغلب انو مافي اجازة مناسبة و كافية عشان ارجع السعودية و اخلص اموري...
الله المستعان...
بس مدري لوكلمناهم من امريكا ممكن يرسلونها على فيدكس او دي اتش ال؟
الله يساااامحكم والله موضوع يحزن وخاااصه لما يكون معاك اطفال واهلك متعلقين فيهم ,,,,,,,,,وانت متعلق اكثررررر بهلك والله انى شااايله هموووووم الدنيا على راسي الله يسهل امورنا ويفرجها ياااااارب ,,,,,,,,,,,
أختي هونيها ...
أنا عائلتي كبيرة وساكنين ببيوت متلاصقة وعدد الأحفاد 33 حفيد زي القمر ..وعلاقتي فيهم أكثر من علاقة والديهم فيهم ..وخايفة والله عليهم يفقدوني صغار ما يفهمون هالأمور ...بس مافيه مجد إلا ويبي له تضحيات ..المتنبي يقول :
لولا المشقة ساد الناس كلهم ..
لو المجد سهل كان كل الناس احرزوا الأمجاد ونالوا الشهادات العليا ..
توكلي على الله وكلها كم يوم ونسلى بدراستنا وخياتنا الجديدة ....إن شاء الله يارب
انا تقريباً على اول رمضان مسافر ..
مافي اي احساس , ولا اي شعور , ولا احس اني مسافر .. :D مدري ليه سبحآن الله ,
بس قبل الفيزآ كنت عادي , احزن شوية , وافرح شوية , وافكر في اهلي واصحآبي وتغير الجو والمكآن ..
وافتكر جاني يوم حسيت بضيقة الله لايوريكم , شوية واكنسل فكرة السفر :( بس الحمدلله عدت على خير ..
بعد مااستلمت الفيزآ احس الوضع عادي ولا كاني مسافر ..
الله يستر , باقي على رحلتي اقل من 20 يوم ..
لااااا ليش تسذا
شكلي بكنسل البعثه :(
اي الله يساعدنا محد يهون عليه يترك اهله واعز ناسه ويسافر ويغترب
الله يصبرنا موضوعك بالصميم
وانا مستلمة قبولي من شهر 1 وأجلت اليييييين 9
ذابحني الحزن من انقبلت وانا ابكي كل ماتذكرت اني باصحى من النوم هناك ولا أحب يدين امي وابوي
ولا بضم احد من اهلي
بيجي المغرب وماشوف ميمتي ودلة القهوة وسوالفها
بيكبرون الصغار ولا عشت احلى سنين العمر معهم
ماتمر ليلة الا اقوم بالواجب دمعتين
هذا وانا مارحت مدري وش بسوي هناك
مابقي كثير مابقي
<<< تصيح
آآآآآآآآه بس يارب رحمتك هونها على قلوبنا واربط على قلوب والدينا
كلهآ فترة زمن تمر كمرور البرق ..
لا تعطون الشيء اكبر من حجمه ..
موفقين
من جد ما أدري ليش مكبرين الموضوع ، حسستوني انكم مهاجرين مو مسافرين لغرض .
توكل على الله ، وادعي كل يوم ان الله يوفقك ، وحط ببالك انك رايح 4 سنين عشان الشهادة وعشان شي يخلي اهلك يفتخرون فيك .
الله يهديكم ماله داعي اجواء الحزن هذي لول .
الله يوفقكم يااارب ويسهل اموركم وترجعون لاهاليكم مرفوعين الراس
والله الغربه صعبه بس الواحد يتحمل >>> الحمد لله والشكر قامت تصيح من الردود وهي حتى القبول مابعد يطلع خخخخخ
والله كلام عين العقل ...
كلها كم سنة تمر مر البرق ونرجع سالمين غانمين .. وكل شيء وله ضريبة . لو كان الأمر سهل كان كل الناس تغربوا !
والإنسان مايدري وين خيرته فيه .
الله يسهلها يارب .
شكرا لأخواني المتفائلين .. :thumbsup:
المشكلة باقي 4 أيام على سفري وماني قادرة أتمالك نفسي
حتى عماتي اللي ماكنت أشوفهم كثير إذا شفتهم أو سمعت أصواتهم صرت أبكي :(
والله حالة !
فيه شيء يقوي القلب يا جماعة !؟ :(
السلام عليكم
انا لي شهرين في امريكا
جاني قرار الابتعاث وامر الاركاب الاربعاء الخميس حجزت وسلمت على اهلي اللي مو بالخبر والجمعه سكرت شناطي
اخر يوم لي كان السبت طبعا كله مع اهلي وتعرفين الوداع صعب بالحيل صياح والحالة خليها على ربك بس واخوياي بالدوانية كل شوي جاء واحد
طبعا الوالدة الله يخليها ويحفظها ماخلتني لين مشيت صياح الودااااااااااااااع صعب بالحيل بس اللي يبي الدراسة تسهل عليه ان شاء الله
الحمد لله انه ماجاء قرار الابتعاث الا قبل 3 ايام من السفرة :)
الله يوفقنا واياك ان شاء الله
جزاك الله خير أخوي...
أنا رايي إني أسوي مثل ماتقول أحسن...
بروح للبنك و اتفاهم معهم انشالله...
فيه شي ثاني...
أنا عندي بطاقة مسبقة الدفع فيزا...
وبصراحة ماحب الفيزا و لا انا متعود عليها أصلا من يوم ما اخذتها و لا أدري عنها...
أنا بطبعي أنسى كثير و لا أحب أشيل بطايق كثيرة معي...
خالي كان في امريكا ولا أخذ فيزا...
نصحني أنو اسحب مبلغ يعني مثلا كل أسبوع و خلاص...أدفع كاش و ريح بالي...وش رايكم؟
الله يسهل لنا ولك
هههههههه الموضوع شـآآآطح ناس تسولف عن بنوووك وناااس تسولف عن وداااع ..
اظن الموضوع الاساسي عن الوداع لـذا هذا ما سأتطرق إلــيه ..
أنا سفري الاسبوع الجااي واتمنى سفري بكره ابغى اوصل بسرعه واعدي هـالمرحله ولافكرت في الوداع
لاني واضع الهدف امام عيني كل ما فكرت في اهلي واخوياي أتذكر الهدف اللي رايح عشانه وبـكذا يزوول الحزن .. الحمدلله ..{
انا قلتلهم راح يرجع اخويه بعد 5 شهور وانا الشهر الي بعدو
صاروا مبسوطين ,,,
وأمي صارت تقول لخالي راح ترجع بنتي بعد 4 شهور ماهم مطولين
^_^ ,,
يا أخي الله ينور عليك أنا مثلك
عجزت أهضم الفيزا بس كلام الناس خلاني أطلعها
لكن طلعت بطاقة فيزا تسوق
يعني تشحنها زي بطاقة سوا بالمبلغ اللي تبيه
مو زي الفيزا العادية فوق رصيدك ويسحبونها متى مابغوا !
وفوق هذا بيكون تعاملي كاش أغلب الوقت إلا في حالة الشراء من النت .
فقط لا غير . لكن انتبه تحمل معك مبلغ كبير في المطار ، ولازم تبلغ عنه .