ظاهرة : الأطباء السعوديون يبقون في كندا ولا يعودون ؟؟

بعيدا عن الأقاويل والإشاعات ..لكني أرى هذا التصرف هو نوعا من الأنانية والنكران للجميل..

المملكة العربية السعودية تصرف المليارات والتريليونات في سبيل بناء أجيال مثقفة وواعية ومتعلمة لدفع عجلة التنمية

والعود بالمنافع على السعودية مهبط الوحي ..لكن للأسف إذا كان هذا حال المتعلمين وتفكيرهم..

يكون بعلمكم ياإخواني وأخواتي أن من ترك فجوة في وطنه ستبقى فجوة طيلة فترة حياتة ولن يملئها غيره..

البلد بحاجتنا..بحاجة إلى أبنائه ..أمتنا بحاجة إلى العلم والتعلم ..يكفينا خنوعا وركونا في المراكز الأخيرة..

من سيقود هذه البلاد مستقبلا هم شباب اليوم فالله الله بالعلم والتعلم مع أخلاص النية ياإخواني..

وفقنا الله وإياكم

انا وجهه نظري وين ما تلاقي مكانك عيش حياتك

تشوف نفسك في السعودية حياك الله

تشوف نفسك بغيرها عادي عيش ايش المشكله

ولا احد يقول لي نكران وما نكران جميل ورد الدين والشعارات الي مالها داعي مع احترامي للجميع

هل سد الدين والوفاء ومدري مين بياكلني عيش اخر الشهر ؟ ولا لا

هل في احد بسيال عني لو اولادي يبون ياكلون ولا وظيفه ولا شي ؟

هل وضعي بشكل عام لو كانت انسان عندي طموح وارغب اني اعيش حياتي واشوف مستقبلي هل راح القى من يدعمني في السعودية ؟ او غيرها محل ما اكون مدعوم مافي مشاكل

ايش يفرق عننا عن اي جنسيه في العالم كلنا زي بعض

الامريكي يجي يشتغل في السعودية ويمكن يعيش طول عمره هنا ولا يتمنى يرجع بلده لانه مبسوط ومرتاح راتب ودلع وعياله في احسن مدارس وهو في احسن كمباوندات وووو الخ في امريكا ما يلاقي ربع الي يلاقيه هنا فقرر انه يترك بلده ويشتغل في السعودية

المصري سيب بلده وعاش محل ما يكون له لقمه عيش امريكا كندا السعودية مزنبيق اهم شي ياكل ويشرب ويعيش والحال ينطبق على سائقك في البيت او الخادمة ما سيبت اهلها وتغربت الا عشان 800 ريال اخر الشهر فكل انسان يجري ورا رزقه بطريقته الخاصه وكل انسان يعيش حياته بطريقته الخاصه

ولا تقول الدافع هو الدشرة ولا الفلة ف هنا كل شي موجود ومتوفر جميع ما يخطر وما لا يخطر على بالك هنا موجود وفي كل مكان موجود في السعودية ولا في غيرها موجود هذي سنه الحياه في الطيب وفي البطال وفي اسود وفي البيض وفي صدق وفي كذب وفي ليل وفي نهار ربنا كذا خلق الدنيا


طبعا لكل انسان ظروفه الخاصه وتقديره للحياه وطبعا هجرة العقول موضوع كبير جدا ولا يكفي لنا حتى سنين نغطية ولكن في قبلنا الكثير سبقونا وهاجروا وعلماء مثل احمد زويل العالم المصري الحاصل على جائزة نوبل ممكن لو كان في مصر ولا يحصل على جائزة من شركة تايم شير حتى

خلاصة الكلام

محل ما ربنا يكتب لك رزق اتوكل على الله ومحل ما تشوف نفسك فعيش والبشر اصناف وانواع

في منهم بس يحب يكون عنده وظيفه وخلاص هذا طموحه وهذي حياته يروح الدوام وينتظر يوم 25 ياخذ راتبة وينام والحمد لله وبيتقاعد ويزوج عياله ويموت

في ناس تحب ان يكون لها دور فعال في المجتمع ويكون له منصب ويكون انسان مختلف عن الناس ومثال هذا المخترع السعودي مهند ابو ديه انسان كان وهو صغير يتضايق لما احد يقول له زي الناس

اهله كانوا يقولوا له ان شاء الله تكبر وتتزوج وتصير زي الناس وتتوظف وتصير زي الناس وهذا الشي كان يضايقه وفعلا سار انسان غير الناس مخترع وله منصب وهو الان كفيف ولازال على ماهو يخترع وماسك منصب وكل شي

في ناس تبي عيالها بس ذاكر ياولد وخلاص يعني لا يهتم في تعليمهم ولا شي كل الي عليه يقول له كلمه ذاكر وينام

وفي ناس لا تبغا اولادها عندها لغات وتبغا اولادها يكونوا مميزين وما يتعبوا في التعليم لما يكبروا ولا يتعبوا في الوظايف

انا قلت لك هي طموحات اعرف ناس كثير حياتهم بيت عمل استراحه بيت عمل استراحه بيت عمل استراحه وبيت وعمل واستراحه واخر شي قبر

كل انسان يشوف وين صالحه وترا هذا الشي ماهو جديد فمن ايام الجاهليه وايام الرسول صلى الله عليه وسلم وايام الخلفاء الراشدين هذا الشي موجود التاجر محل ما يلاقي زباين يبيع والانسان محل ما يلاقي نفسه في امان يعيش وهكذا واعطيم مثال بسيط هجرة رسول الله صلى الله عليه وسلم من مكه الى المدينه بعد ان اشتد الاذى عليه صلى الله عليه وسلم من كفار قريش وووو قرر الذهاب الى المدينه صلى الله عليه وسلم وعاش ومات فيها صلى الله عليه وسلم عاش في المدينه لانه لقى الامن والامان والترحيب وتم اعلان الدعوة رسميا في المدينه بعد ان كانت سرا في مكه فشوف سبحان الله كيف قوي الاسلام وقويت الدعوة وووو بالهجرة النبوية

هذا مثال من واقع الحياه ودرسناه في كتبنا ولقدوة الخلق المصطفى محمد صلى الله عليه وسلم

انا في النهاية اقول للجميع انا لا مع او ضد الهجرة الى اي بلد لكن انت شوف ميولك وايش تحب تحب تنام وتروق وظيفه وتقليب جرايد طول عمرك في اماكن خاصه بهذا الشي تحب تنتج ايضا في اماكن خاصه بهذا الشي

وبالتوفيق للجميع

الآن سؤال
ليش الدولة تصرف ملاييين على الطلاب المبتعثين؟
طبعاً لأن الدولة تبغى تطوير في البلد
يعني الناس اللي صرفت عليهم واجب عليهم يخدموا البلد لأنه لو مو الدولة اللي ساعدتهم بعد الله ماكان وصلوا الى ما وصلوا اليه
وحتى الإمريكي اللي يجي وتصرف عليه الدولة ترى لأن الدولة تبغى الفايده للبلد
انا ابداً ما يهمني ان شخص من الناس قرر يعيش برا ويترك السعوديه
انا يهمني الناس المبدعيين اللي تقدم لهم عروض جبارة عشان يعيشوا هنا على طول
يعني زي ماقال زحلطن هجرة العقول
اما البزران اللي دوبه درس كلمتين ويقول انا بعيش هنا على طول هذول يغيرون رايهم بعدين واذا ما غيروا الفكه من جحا غنيمة

الدولة تصرف جزاها الله خير وما قصرت لكن الاصتدام بالواقع المرير صعب وصعب جدا جداجدا

كلنا عندنا وطنيه وكلنا فداء للبلد والحمد لله مافي شك. في وطنيتنا ولكن البطانه ممكن تغير مجرى حياتك نعم هذا الشي مكتوب لك من عند الله سبحانه وتعالى ولكن الاسباب مهمة

الملك عبد الله اطال الله في عمرة ما قصر في شي فتح الابتعاث وما قصر

راح اعطيك مثال الابتعاث فقط وما راح ادخل في غير الابتعاث هذا فقط على سبيل المثال

الابتعاث وشروطه وتغيير الشروط كل فترة ليش وفي صالح من

الغاء ابتعاث حملة الدبلوم ليش وفي صالح من

ارسال الطلاب حقين الماستر والدكتوراه من غير قبولات ليش وفي صالح من

ليش تروح وانت مانت داري تنقبل ولا لا ليش ما يكون في تنظيم وترتيب تحجز مقاعد في جامعات معينه باتفاقيات بين الدولتين تقبلي طلابي يا جامعه فلان ارسل طلابي عندك ما تقبلي مع السلامة في غيرك كثير
ولا يمنع اننا مثلا نعرض مقاعد للمميزين في جامعه الملك عبد الله من تلك الجامعات وتسير عصفورين بحجر واحد عيالنا درسوا ووانقبلوا وعيالهم المميزين درسوا وجاتهم فرصه ممتازة للابداع

ليش ما يكون هناك تنظيم في التخصصات
ارسل واحد يدرس ادارة واقتصاد من قل خريجين الادارة مثلا ولا ايش الهدف وفي صالح من الفلوس هذي كلها تروح

ليش ما كل طالب مبتعث عارف وين وظيفته ويكون الابتعاث عن طريق البرنامج وبالتعاون مع الدوائر الحكومية

مثلا وزارة الصحة طلبت ١٠ اطباء اسنان و١٠ جراحه واثنين طب اطفال

اجيب المتقدمين واقول لهم لا تخرجت وظيفتك هنا والحمد لله والحال ينطبق على الكل سابك ارامكو الوزارات كلها وهكذا نعرف ايش التخصص المطلوب بدل ما اري الكل طب اطفال والمطلوب فقط ٢ مثلا والبقيه في البيت


انظم طريقه الابتعاث اكثر استفيد من كل طالب اكثر اشوف مين المبدعين واحاول اعطيهم فرص اكبر وهكذا

هذا كله شغل الوزارة وشغل ديوان الخدمة وشغل وشغل وشغل يعني الواقع للاسف مرير ويحتاج الكثير للتطوير ويحتاج مئات السنين عشان نوصل بس لمرحلة من الوعي البسيط فقط مو الشي الي مرررة

يعني بشكل عام انا ما الوم الناس الي تهاجر بسبب البيروقراطية مثلا ولا بسبب الروتين ولا بسبب اشاء اخرى رغم ان الدولة ما قصرت ووفرت الكثير لكن التنفيذ والتطبيق بالشكل الصحيح هو المطلوب

اعطيك مثال ثاني عن جامعاتنا هنا

مليون شرط وشرط عشان تنقبل وفي احسن جامعات العالم ممكن تنقبل في دقيقه شوف الفرق

اقسام مالها داعي مفتوحه ليش اصلا
علوم بحار مثلا ايش راح استفيد من الخريجين بس جلسه في البيت اصرف عليه وادرسه ومعامل ومقاعد دراسيه ورواتب دكاترة وووو وفي الاخير ماله الا كتاب واحد بعد التخرج كتاب تعلم الطبخ وساعد امك

في امور يحتاج ان الواحد يفكر فيها اكثر

وبالنسبه لي هي ثقافه مجتمع اكثر من انه مبدا هجرة او لا
والهجرة بشكل عام مو شرط تكون من بلد لبلد ممنك في نفس البلد

كثير ناس تجيه وظيفه مثلا في الشرقيه يقول لا لا بعييييد وابي اهلي ووو ولا يكون عنده اي سبب مقنع في ناس عندهم ظروف معذورين وفي ناس لا
طالب ينقبل في الرياض مثلا في الجامعه وهومن جدة يقول لا لا ما اقدر اعيش ولا اقدر ولا اقدر وبعيد وووو الخ

انا ثقافتي محل ما ربنا يكتب لك رزق روح ولا تتدلع الا اذا عندك اسباب قوية ومقنعه اما دلع صراحه الزمن الان مو زمن دلع يمكن زمان كانت الوظايف في الشارع تبغا الخطوط تبغا الاتصالات تبغا الصحة تبغا جدة تبغا المدينه اي مكان متوفر اما الان لا واختلف الوضع كثير

تتعدد الأسباب ولكن الأهم من وجهة نظري المتواضعه

ان المناخ العملي والمهني في السعوديه لا زال يعاني من ما يسمى بــ ( عدم تكافؤ الفرص )

والمقوله المذكوره أعلاه للأسف الشديد ليست مجرد ثلاث كلمات فحسب

بل أنها هي المعضله الأساسيه في رغبة ملايين الشباب من أطباء وغيرهم بالهجره إلى الأوطان التي تقدر المواهب وتنمي مواهبهم المكتسبه خلاف ما هو حاصل لدينا في المملكه

فالمسأله لا تعدوا كونها (( دق على فلان او بدقلك على فلان )) والبقية الباقيه من الحكايه لا تحتاج إلى إسهاب

شكراً ..,

اما عن وزارة التعليم العالي فانا غاسل يدي منهم من زماااان
وهذا اللي قلتوا عليه اسمو فساد وللأسف ما نقدر ننكر وجوده في كل الوزارات
وعشان كذا انا اتمنى ان الناس المبدعيين والأمينين ما يتركوا الوطن للفساد
نرجع ونحاول نصلح
اذا كل مبدع وقادر راح
يعني ترك الفاسدين يأخذوا راحتهم
هذا قصدي

اعتقد السبب من وجه نظري عدم تقدير الطبيب السعودي او اي شخص عامل في مجال الطبي...

انا ممرضه ولي 5 سنوات ولم احصل على تقدير داخل وطني برغم من الشهادات الي حصلت عليها ولكن ابقى دبلووم وليس بكالوريوس...<<<يعني مالك داعي..

وفي مجالنا اغلبهم حتى المواطنين يفضلون الاجنبي على ابن البلد... بحيث انك لو سافرت خارجا...كل الناس نتبسط انك ممرض طبيب او حتى عامل في مجال الصحه..

ازا اهلك وهما اهلك مايرضوى تقيس ليهم الضغط وازا قستوا مشككين في قرائتك ..؟؟؟

وغير نظام العمل غير فاعل ولا مفيد...

فا من حقهم يجلسوا هنا ولا يهاجرووو...

كندا فيها نقص في الاطباء الكنديين فعشان كذا قامو يغرون الاطباء السعوديين لانهم اكثر ابتعاث لهم